Af hverju er stærðfræði til?

Svar

Stærðfræðin og önnur vísindi eru til einkum af tveimur ástæðum. Í fyrsta lagi er gagnlegt að ráða yfir þekkingunni og skilningnum sem í þeim felst og í öðru lagi svala vísindi og þekking forvitni okkar. Seinni ástæðan gæti þó verið tengd þeirri fyrri, það er að segja að við erum kannski forvitin af því að við finnum eða vitum að það kemur sér vel, bæði fyrir einstaklinginn og hópinn.

Ef einhver segir mér að tvö pör af fólki hafi farið upp í ákveðinn bíl, þá veit ég um leið að fjórar manneskjur eru í bílnum. Ég þarf ekkert að klóra mér í kollinum yfir því, reyna að telja eða eitthvað slíkt, því að ég veit að 2 + 2 eru 4.

Ef kaupmaður ætlar að gefa mér 20% afslátt af vöru sem kostar 12000 krónur og segir að verðið sé þá 10000 krónur, þá kemur sér vel að vita að það er vitlaust reiknað og verðið á að vera 9600 kr.

Ef tveir bílar mætast á vegi og eru báðir á 90 km hraða, þá er ágætt að vita að hraði bílanna hvors miðað við annan er 180 km á klukkustund og árekstur yrði eins og bíll á þeim hraða keyrði á kyrrstæðan bíl. Það er líka ágætt fyrir bílstjóra að vita hvernig bílar hegða sér í beygjum og það er hægt að nota stærðfræði til að glöggva sig á því.

Sem sagt, stærðfræði er til margra hluta nytsamleg, bæði í einkalífi og í ýmsum störfum. Mörgum sem ná þokkalegum tökum á henni finnst hún líka skemmtileg; til dæmis er gaman að ráða stærðfræðiþrautir.

Þess vegna er stærðfræði til, þess vegna er hún kennd í skólum, og þess vegna borgar sig að læra hana!

Hægt er að finna meira lesefni um þessa hluti með því að smella á efnisorðin sem fylgja svarinu.