Hvaða Gvend grunaði ekki og hvaðan kemur orðatiltækið?

Svar

Merking orðatiltækisins grunaði ekki Gvend er ‛datt mér ekki í hug, ég átti von á þessu’. Það er ekki gamalt, virðist koma fram snemma á 20. öld. Í Íslensk-danskri orðabók Sigfúsar Blöndals (1920–1924) er einnig nefnt grunaði ekki gamla Gvend en viðbótin gamla hefur ekki verið mjög algeng.

Hugsanlega liggur gleymd saga um Guðmund biskup á Hólum (d. 1237) að baki orðatiltækinu grunaði ekki Gvend. Gælunafn hans var Gvendur og það kemur meðal annas fram í Gvendarbrunnum í Heiðmörk sem sjást á myndinni.

Gvendur er eins og kunnugt er algengt gælunafn þeirra sem heita Guðmundur. Þannig var til dæmis Guðmundur góði, biskup á Hólum (d. 1237), gjarnan nefndur og gælunafn hans kemur til dæmis fram í öllum þeim Gvendarbrunnum sem hann á að hafa vígt. Hugsanlega liggur einhver gleymd saga um Guðmund biskup að baki orðatiltækinu grunaði ekki Gvend.

Mynd:

• Mats Wibe Lund. (Sótt 8.05.2012).