Hvort lenti höggið á höfðinu eða herðunum þegar menn voru klofnir í herðar niður í Íslendingasögunum?

Svar

Í Njáls sögu segir frá því í 120. kafla að Ásgrímur Elliða-Grímsson og Njáls synir gengu til búðar Þorkels háks í leit að liðveislu á þingi. Hvöss orðaskipti urðu milli Skarphéðins Njálssonar og Þorkels. Þorkell þreif sax sitt og Skarphéðinn stóð með reidda öxina og sagði: „Ger þú nú annaðhvort Þorkell hákur að slíðra saxið og sest niður eða eg keyri öxina í höfuð þér og klýf þig í herðar niður.“

Maður klýfur annan í herðar niður. Úr Svalbarðsbók frá 14. öld.

Af þessum orðum að dæma er högginu beint að höfðinu og höggið það þungt að öxin klýfur það niður að öxlum.

Heimild:

• Íslendinga sögur. Fyrra bindi. Bls. 268. Reykjavík: Svart á hvítu. 1985.

Mynd:

• Handritin heima - fræðsluvefur. Sótt 27.12.2011.

Upprunalega spurningin hljóðaði svo:

Hvað er átt við þegar sagt er í Íslendingasögum að einhver hafi verið klofinn í herðar niður? Kemur höggið þá fyrst í höfuðið og niður að herðum eða kemur það fyrst á herðarnar?