Hvað eru mörg fótboltalandslið í heiminum?

Svar

Þegar þetta er skrifað eru 208 landslið karla á skrá hjá Alþjóðaknattspyrnusambandinu (FIFA). Þar af eru 46 í undirsambandi FIFA í Asíu, 53 í Afríku, 10 í Suður-Ameríku, 11 í Eyjaálfu, 53 í Evrópu, og í Norður-Ameríku, Mið-Ameríku, og Karíbahafinu eru samtals 40 landslið á skrá. Fimm þeirra síðastnefndu tilheyra þó ekki FIFA: Franska Gvæjana, Gvadelúpeyjar, Martiník og tvö lið eyjunnar Sankti Marteins.


Stuðningsmenn brasilíska landsliðsins.
Til eru fleiri landslið, en þar sem þau eru ekki meðlimir í FIFA er þeim óheimilt að taka þátt í heimsmeistaramótinu í knattspyrnu. Nokkur landslið sem áður voru meðlimir í FIFA hafa nú lagt upp laupana sökum þess að ríkin sem þau spiluðu fyrir eru ekki lengur til. Þetta eru lið Tékkóslóvakíu, Austur-Þýskalands, Saar, Suður-Víetnam, Suður-Jemen, Sovétríkjanna og Júgóslavíu.

Samkvæmt heimasíðu FIFA eru 129 kvennalandslið í knattspyrnu á styrkleikalista sambandsins, en eflaust eru þó fleiri starfandi.

Frekara lesefni á Vísindavefnum

• Hvaða lið í ensku úrvalsdeildinni í knattspyrnunni er elst? Hvert þeirra er yngst? eftir Unnar Árnason.
• Hver er vinsælasta íþrótt í heimi? eftir UA.
• Hver fann upp fótboltann? eftir Unnar Árnason.
• Hvernig er styrkleikalisti FIFA reiknaður út? eftir JGÞ.
• Hvert er elsta knattspyrnufélag í heimi? eftir Röskvu Vigfúsdóttur.

Heimildir og mynd

• List of men's national football teams. Wikipedia: The Free Encyclopedia.
• Women's ranking & statistics. FIFA.com.
• Fifa World Cup 2006: Brazilian Football Fan. Flickr.com. Höfundur myndar: Bing Munich.

---

Þetta svar er eftir nemanda í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2006.