Hvaða kyn hefur orðið skúr þegar talað er um rigningarskúr?

Svar

Orðið skúr er eitt þeirra orða sem notað er í tveimur kynjum, annars vegar kvenkyni og hins vegar karlkyni. Beyging orðanna er þessi:

Karlkyn	Eintala	Fleirtala	Kvenkyn	Eintala	Fleirtala
Nefnifall	skúr	skúrar	Nefnifall	skúr	skúrir
Þolfall	skúr	skúra	Þolfall	skúr	skúrir
Þágufall	skúr	skúrum	Þágufall	skúr	skúrum
Eignarfall	skúrs	skúra	Eignarfall	skúrar	skúra

Notkunin var áður fyrr nokkuð staðbundin. Karlkynið var einkum notað á Norðurlandi, það er einhverjir skúrar, en kvenkynið sunnanlands, einhverjar skúrir. Nú eru mörkin ekki jafn glögg og áður og heyra má til dæmis bæði kynin nánast jafnt í Reykjavík. Oft slær kynjunum saman. Til dæmis getur sami maður sagt: „Það gerði mikinn skúr (kk) um miðjan daginn“ og „Það voru skúrir (kvk) allan daginn“.

Einhverjir skúrar eða einhverjar skúrir í kortunum?
Upprunalega spurningin hljóðaði svo:

Veðurfræðingur í sjónvarpinu talaði ítrekað um að einhverjir skúrir væru í kortunum. Nú hef ég alltaf haldið að orðið skúr væri kvenkynsorð. Hvernig beygist orðið skúrir í þessari samsetningu?