Gáta: Hvernig kemst bóndinn yfir ána?

Svar

Á litlum bæ í Skagafirði bjó bóndi nokkur ásamt konu sinni og börnum. Bærinn stóð í litlum dal sem var einangraður frá umheiminum af á sem rann í gegnum dalsmynnið. Á ánni starfaði hins vegar ferjumaður sem ferjaði fólk yfir ána í litlum tveggja manna bát.

Í bænum hinumegin við ána var haldinn markaður hálfsmánaðarlega og var bóndinn þar tíður gestur. Á einum slíkum markaðsdegi fékk bóndinn á útsölu úlf, svín og stóran poka af korni. Bóndinn var að vonum ánægður með kaupin og hélt glaður heim á leið. Málið vandaðist hins vegar þegar bóndinn kom að ánni. Hann áttaði sig á því að hann gat aðeins setið í báti ferjumannsins með eitt í fanginu í einu, það er ýmist úlfinn, svínið eða kornið. Auðvitað hefði ekki verið neitt tiltökumál að fara margar ferðir yfir ána, en því miður myndi úlfurinn éta svínið ef skilin eftir ein, og sömuleiðis myndi svínið éta allt kornið fengi það tækifæri til.

Nú eru góð ráð dýr. Hvernig kemst bóndinn með allan varninginn yfir ána án þess að úlfurinn éti svínið eða svínið kornið, ef hann má aðeins taka eitt þeirra með sér í bátinn í einu?

---

Lausn gátunnar ásamt nöfnum þeirra sem sendu inn rétt svör hefur nú verið birt hér

---

Mynd: hazzlefreeclipart.com