Hver er stærsti skóli landsins og hvað eru margir krakkar í honum?

Svar

Á heimasíðu Hagstofu Íslands má finna margs konar fróðleik, meðal annars upplýsingar um fjölda nemenda í einstökum skólum á öllum skólastigum. Þegar þetta er skrifað, í lok maí 2009, eru reyndar ekki komnar upplýsingar um árið 2009 eins og spurt var um, þannig að svarið miðast við árið 2008.

Að meðaltali voru um 250 nemendur í hverjum grunnskóla á landinu árið 2008 og var munurinn á fjölmennasta og fámennasta skólanum var 757 nemendur! Fjölmennasti grunnskólinn var Árbæjarskóli með 759 nemendur, en fámennasti skóli landsins árið 2008 var Finnbogastaðaskóli í Árneshreppi þar sem nemendurnir voru aðeins 2.


Árbæjarskóli er fjölmennasti grunnskóli landsins.
Hér fyrir neðan má sjá hverjir voru 10 fjölmennustu grunnskólarnir á Íslandi árið 2008.

Skóli	Fjöldi nemenda
Árbæjarskóli	759
Varmárskóli	714
Rimaskóli	693
Seljaskóli	684
Lágafellsskóli	672
Vallaskóli	657
Grunnskóli Vestmannaeyja	638
Grunnskóli Seltjarnarness	607
Grundaskóli	587
Lindaskóli	561

Eins og við er að búast eru langflestir fjölmennustu grunnskólarnir á höfuðborgarsvæðinu en þrír skólar utan þess komast þó á þennan lista. Það eru Vallaskóli á Selfossi, Grunnskóli Vestmannaeyja og Grundaskóli á Akranesi.

Þess má geta að árið 2008 var næstum því helmingur allra sveitarfélaga á Íslandi, alls 38, fámennari en Árbæjarskólinn.

Eflaust fyndist nemendum úr þessum stærstu skólum landsins skrýtið að koma í fámennustu skólana þar sem fjöldi nemenda nær ekki þeim fjölda sem myndar bekk í stóru skólunum. Eins og áður sagði var Finnbogastaðaskóli með fæsta nemendur árið 2008. Þrír aðrir skólar voru með færri en 10 nemendur, í Grunnskólanum í Grímsey voru 7 nemendur, 8 í Grunnskólanum í Hofgarði og 9 í Grunnskólanum í Svalbarðshreppi.

Í þessu svari var gert ráð fyrir að átt væri við grunnskóla. Til gamans má geta þess að fjölmennasti framhaldsskólinn, Fjölbrautarskólinn í Ármúla, var með 2.914 skráða nemendur. Langfjölmennasti skóli landsins var þó Háskóli Íslands með 11.847 skráða nemendur árið 2008.

Frekara lesefni á Vísindavefnum:

• Hvað eru margir skólar í Reykjavík? eftir ÍDÞ

Mynd:

• Reykjavíkurborg. Sótt 27. 5. 2009.

Upprunalega hljóðaðið spurningin svona:

Hver er stærsti skóli á landinu árið 2009? Hvað eru margir krakkar í honum?