Hversu margar bakteríur eru í mannslíkamanum?

Svar

Talið er að í heilbrigðum einstaklingi séu um það 10¹³ frumur en 10¹⁴ bakteríur. Bakteríurnar í okkur eru því um 10 sinnum fleiri en frumurnar!

Bakteríur lifa bæði í og á líkamanum. Flestar bakteríur eru í meltingarveginum en meðal annarra staða þar sem bakteríur þrífast vel eru munnur, nef, húð og kynfæri.

Skipta má þeim bakteríum sem lifa í eða á mannslíkamanum í þrennt, bakteríur sem hafa jákvæð áhrif á líkamsstarfsemina, bakteríur sem hafa neikvæð og jafnvel skaðleg áhrif og svo bakteríur sem gera okkur hvorki gagn né ógagn og eru þær flestar.

Meðal þess gagns sem við höfum af sambýlinu við bakteríur má nefna að þær eru afar mikilvægar þegar kemur að meltingu, til dæmis taka þær þátt í að sundra fæðunni og stuðla að jafnvægi í þarmaflórunni með því að hamla vöxt skaðlegra baktería. Einnig geta bakteríur aukið virkni ónæmiskerfisins og haft jákvæð áhrif á viðnám gegn sýkingum, svo aðeins örfá dæmi um gagnsemi þeirra séu nefnd.


Bakteríur sem lifa í munninum koma við sögu við myndum tannsteins.
En bakteríur sem lifa á eða í líkamanum geta líka reynst okkur til ama og jafnvel verið skaðlegar. Til dæmis má rekja svitalykt, táfýlu, vindgang, andremmu og tannskemmdir til baktería. Meltingartruflanir eru líka gjarnan af völdum baktería. Einnig geta bakteríur sem venjulega valda ekki tjóni á sínum "rétta" stað í líkamanum orðið til ama berist þær á annan stað. Til dæmis eru bakteríur sem eiga uppruna sinn í endaþarmi og ristli algeng orsök blöðrubólgu, en þær hafa þá borist í þvagrásina eins og fjallað er um í svari við spurningunni Af hverju fær maður blöðrubólgu?

Á Vísindavefnum eru fjölmörg svör sem fjalla um sjúkdóma af völdum baktería en þá er í flestum tilfellum um að ræða bakteríur sem berast í líkamann en ekki bakteríur sem eru hluti af örveruflóru mannslíkamans. Sem dæmi má nefna svör við spurningunum:

• Hvað er kossageit og hvernig smitast hún?
• Hvaða áhrif hefur kólera á líkamann?
• Hvað er hermannaveiki?
• Hvað er holdsveiki?
• Hvers vegna myndast magasár?
• Af hverju fáum við gubbupest?
• Af hverju fær fólk niðurgang og hvernig er hægt að bregðast við honum?

Heimildir og mynd:

• American Society for Microbiology. Humans Have Ten Times More Bacteria Than Human Cells: How Do Microbial Communities Affect Human Health? ScienceDaily 5. júní 2008. Skoðað 18. febrúar 2009.
• Human flora á Wikipedia. Skoðað 18. febrúar 2009.
• Bacteria á Encarta. Skoðað 18. febrúar 2009.
• Google Answers. Skoðað 18. febrúar 2009.
• Mynd: Dental plaque á Wikipedia. Skoðað 19. febrúar 2009.

---

Upprunalega hljóðaði spurningin svona:

Hversu margar bakteríur inniheldur líkami venjulegrar manneskju?
(Hvert er hlutfallið miðað við frumur í líkamanum?) Hvað vega þessar bakteríur hlutfallslega mikið heildar líkamsþyngd?