Halda vottar Jehóva upp á jól?

Svar

Nei vottar Jehóva halda ekki jól. Ástæðan er sú að þeir líta svo á að jólin séu upprunalega heiðin hátíð og að siðir sem tengjast jólunum komi þess vegna frá fornum falstrúarbrögðum. Vottar Jehóva benda meðal annars á að Jesús hafi ekki fæðst 25. desember auk þess sem kristnum mönnum hafi ekki verið fyrirskipað að halda fæðingu hans hátíðlega.

Vottar Jehóva eru meðal annars þekktir fyrir öflugt trúboð.
Það sama gildir um páska og afmælisdaga. Vottar Jehóva halda ekki páska þar sem siðvenjur sem þeim tengjast eiga sér rætur í heiðni og að sama skapi halda þeir ekki upp á afmæli fólks þar sem sá siður að fagna fæðingardögum er kominn frá fornum trúarbrögðum sem áttu ekkert skylt við kristni.

Á Vísindavefnum er að finna ýmsan fróðleik um jólin, til dæmis í svörum við spurningunum:

• Hvar í Biblíunni er jólaguðspjallið? eftir Sigurð Ægisson
• Af hverju höldum við jólin í desember ef sagt er að Jesú hafi fæðst í júlí? eftir Sigurjón Árna Eyjólfsson
• Hvers vegna eru jólin ekki haldin á sama tíma alls staðar? eftir Eyju Margréti Brynjarsdóttur
• Hversu margir kristnir hátíðisdagar eru byggðir á gömlum heiðnum hátíðisdögum? eftir Árna Björnsson

Heimildir:

• Opinbert vefsetur Votta Jehóva. Skoðað 17. 12. 2009.
• Answers.com. Skoðað 17. 12. 2009.
• JW Info Line. Skoðað 17. 12. 2009.

Mynd:

• Wikipedia.org. Sótt 23.12.2009.

---

Hér er einnig svarað spurningunni:

Af hverju halda Vottar Jehóvar ekki uppá afmæli þó afmæli tengist ekki jólunum eða trú?