Hvað eru til mörg nöfn á Íslandi?

Svar

Spurningunni er ekki auðvelt að svara. Svarið fer eftir því við hvað er miðað. Ef átt er við þann fjölda nafna sem Íslendingar hafa borið svo vitað sé eru nöfnin rúmlega 6000. Ef aðeins er átt við þau nöfn sem nú eru í notkun eru þau heldur færri. Árið 1983, þegar ég lét athuga fyrir mig fjölda nafna á þjóðskrá, voru kvenmannsnöfn 2538 en karlmannsnöfn 1994. Frá þeim tíma hafa einstaklingar fallið frá sem voru einir um nafn en aðrir bæst við með nýjum nöfnum. Mannanafnanefnd samþykkir á mánuði hverjum 5-10 ný nöfn.

Til fróðleiks má geta þess að nafnaforðinn hefur verið að aukast jafnt og þétt á síðustu öldum. Árið 1703, þegar fyrsta manntalið var tekið, voru á skrá 387 karlmannsnöfn og 338 kvenmannsnöfn. Í manntalinu 1910 voru karlmannsnöfn 1071 en kvenmannsnöfn 1279.



Sjá einnig:

• Hvert er algengasta nafn á íslandi?
• Hvenær hófst notkun gælunafna á Íslandi?
• Hver eru 10 sjaldgæfustu nöfnin á Íslandi?
• Hvenær voru lög um bann við ættarnöfnum samþykkt á Alþingi? Hvað yrði gert ef ég byggi til mitt eigið ættarnafn í dag?