Er silfurberg merkasta framlag Íslands til mannkynssögunnar?

Fyrirlestur í Öskju náttúrufræðahúsi Háskóla Íslands, sal 132, kl.
14:00, þann 20. október.
Silfurberg hefur gegnt fjölbreyttu og oft ómissandi hlutverki í merkum vísindauppgötvunum, sem sumar hverjar urðu tilefni Nóbelsverðlauna. Þær flýttu fyrir framþróun ýmissa sviða raunvísinda á 19. öld og fram eftir þeirri 20., til dæmis í rafsegulfræði, lífrænni efnafræði, kristalla- og steindafræði, og svonefndri nútímaeðlisfræði sem byggir meðal annars á kenningum Einsteins.

Silfurberg. Lengi vel fannst silfurberg óvíða nema á Íslandi. Var mikið magn þess flutt utan frá Helgustöðum til nota í mælitækjum og tilraunum; skipuleg námuvinnsla fór fram þar með hléum á árabilinu 1850-1925, og einnig við Hoffell í Hornafirði um hríð frá 1911.

Leó Kristjánsson prófessor í jarðeðlisfræði mun fjalla um fjölbreytt hlutverk silfurbergs í merkum vísindauppgötvunum í fyrirlestraröð Raunvísindadeildar Háskóla Íslands í tilefni árs jarðarinnar 2008.

Allir eru velkomnir á meðan húsrúm leyfir.