Af hverju gjósa fjöll? Nýútkomin spurningabók Vísindavefsins

Af hverju verða eldgos? Eru eldgos alltaf í eldfjöllum? Hvar er mest af eldgosum á jörðinni? Eru eldgos úti í geimnum? Hvað þarf ég að læra til þess að vera eldfjallafræðingur?

Í bókinni Af hverju gjósa fjöll? Spurningar og svör af Vísindavefnum um eldgos er að finna 40 spurningar og svör um eldgos auk margs konar fróðleiksmola og tenginga við umhverfi okkar. Öllum svörum fylgja skemmtilegar og skýrandi myndir og kort sýna helstu eldfjöll jarðar, flekaskil og íslensk eldfjöll. Svörin eru sett fram á einfaldan hátt en þó með vísindalegri nákvæmni og er bókin ætluð fróðleiksfúsu fólki frá átta ára aldri.

Þórarinn Már Baldursson myndskreytti bókina á sinn skemmtilega hátt og höfundar eru Þorsteinn Vilhjálmsson, Jón Gunnar Þorsteinsson og svarshöfundar Vísindavefsins.

Bókin fæst í vefverslun Forlagsins og bókabúðum.